· 

Rückblick Wo. 27 / 01.07. - 07.07.2019

Im Wochenrückblick schreibe ich frisch von der Leber was mich in dieser Woche beschäftigt.

Dieses Mal grad wie mir dr Schnabel gwachse isch

...D Hitzewälle rollt us u z Donnerwätter rollt a!

"Donnerwätter-Hagu-nomal" het das Ta. Ja genau so. Heiss isches gsi no dr ganz Tag u am Abe isch äs de cho, z Uwetter!!! Its verschlats üs üse schön Garte z Hudus u Zfätzes. Schliesslech si da Hagelsteine cho so gross wie Tennisbäll oder wie Baumnüss? Eh nei nid so gross u o nid ä Jede isch gross gsi. No grad Schwein gha. Am Garte hets nüt gmacht. Nume üses Dach vom Velounterstand het eis abübercho u äs Loch. "Donnerwätter-Hagu-nomal" bal jedesmal wes rägnet wirfts no Steine. Aber abkühlt hets nume Tämperatur mässig. Z' Gfühl isch geng no warm oder für mich ersch its richtig wüll its wirds tüppig! So ha ig grad nid würklich guet chönne schlafe aber nu.

"Donnerwätter-Hagu-nomal" isch das Wättertechnisch ä Wuche gsi. Da hets mängisch Lokal achegläärt, dass me Ungerzueche nid hätti gmerkt, dass i de Bachbett de ä Huufe Wasser u Holz chönt cho aber da git's TipTopi Warnsystem u am Samstig hets no so gchutet, dass me fasch nid alles het möge häbe.

Blitze hets abartig viel gä, uuuh weme die Energie chönnt nutze hät me allwäg keini Stromproblem me.

Viellecht würde de aber so ä Formu-E Bolide mit so ämä Schub grad mit 500 dür Bern frehse, dass hingäge wär de "potz-Donnerwätter-Hagu-nomal" nid grad lustig.

 

Nid nume Wättertechnisch...

...hets donneret, blitzet, ghaglet u gluftet. O bi mir, isch chli Turbulenz agseit. Chume grad nid wiiter bi mire Loufbahn. Ha gmeint gfunde z'ha was ig mir Vorstelle doch isch Mängs nid so eifach. Guet i bi Aspruchsvoll i wot nach all dene Jahre ä Schoggijob! Büez wo mir gfallt u mi erfüllt. Kreativ u Sinnvoll muess äs si. Ja u Lehrrich unbedingt! Bi gwunderig drum nid abgneigt no chli z Schulbänkli z drücke.

Merke schaffe isch nid unbedingt äs Thema ir letschte Ziit aber Büez muess me ha. We me all die Kundgäbige chli het verfolgtoder die Vorstöss wo Gsellschaft wot mache, geit's immer nume um "z zahlte nid schaffe"! Jede wot Geld ä guete Job aber am beste natürlich ohni z bügle.

"Donnerwätter-Hagu-nomal", ig würd lieber bügle sicher o nid zviel aber vorallem das zahlt, muess aber o nid ä Gage si! Aber de glich ä richtige Job heisst halt mä muess agmesse zahlt si u süsch schaffet me Ehreamtlich was me de darf gratis mache. Wie we ig nid scho gnue vo dene Ämtli hät! Würd gern no chli gschieder werde aber gschied isch hüt wer Sprache cha. Die Sprach wo mi würd interessiere wüll ig z Gfüehl ha die gieng mir ringer nämlich Gebärdesprach, cha ig hie nid lerne, git kener Agebot. Obwohl si ja genau Sprach u Dialekt abhängig isch. Bi dä andere ischs ja nid so, dass ig grad gar nid interessiert wär aber ig bringe se eifach nid uf d'Reihe, "Donnerwätter-Hagu-nomal"! So hani gmerkt nid ä mal eifach chli Schulbänkli drücke chani. Viellicht fa ig eifach no mal ir erste Klass a.

Wet nid dür die halbi Schwiiz fahre für Büez, sondern we möglich z Fuess oder mit Velo zur Arbit. Was doch Super wär bi all dene Klimadebatte oder!? Übrigens ha ig dr Alice Hofer ihri Kolumne im Thuner Tagblatt vom sechste Juli nünzeh glese. He mega, das müesst dir o glese ha, genau das meini.

Ja nu "Donnerwätter-Hagu-nomal", sueche mer halt no chli nam Schoggijob, viellecht stoglemer ja würcklich bald uf z Richtige anstatt überne Hagustei!

 

 

Kommentar schreiben

Kommentare: 0